Iritziak
Apirilak 12: Lehen Mailako Arretaren Nazioarteko Eguna
Lehen mailako arreta da edozein osasun-sistema sendo eta eraginkorraren oinarria
Irisgarritasunean, arreta integralean, etengabeko jarraipenean, prebentzio-ikuspegian eta ospitaleko arreta eskuratzeko iragazki eta koordinatzaile gisa du balioa. Gainera, profesionalen eta pazienteen arteko harreman gizatiarragoa sustatzen du. Azken batean, lehen mailako arreta sendo batek herritarren bizi-kalitatea hobetzen du eta osasun-baliabideak optimizatzen ditu.
Baina egungo egoera kezkagarria da. Talentua duten profesional gazteek atzerrira eta medikuntza pribatura alde egitea errealitate bat da. Azken BAME deialdian, Familia Medikuntzako 246 plaza esleitu gabe geratu ziren, eta horrek agerian uzten du espezialitate hori ahalduntzeko premia larria.
Egoera horri buelta emateko, ez da beharrezkoa BAME prestakuntza-aldia murriztea, baizik eta egiturazko aldaketak konbinatzea, aitorpen profesional handiagoa izatea eta familia-medikuek osasun-sisteman duten zeregina indartzea.
Hona hemen ildo estrategiko batzuk:
- Espezialitatearen balioa handitzea, familiako medikuei ikusgarritasun eta izen handiagoa emanez.
- Profesionalei pizgarriak ematea, lan-baldintza hobeekin eta garapen-aukerekin.
- Lehen mailako arretan inbertsioa handitzea, azpiegitura, langile eta teknologiarako baliabide nahikoak bermatuz.
- Burokrazia murriztea, tresna digital eraginkorren bidez eta zeregin administratiboak beste profesional batzuen esku utziz.
- Agendak adostea, kontsulten gainkarga saihestuz eta kalitatezko arreta ahalbidetuz.
- Kalitatezko etengabeko prestakuntza sustatzea, profesionalen eguneratzea eta gaikuntza hobetzeko.
- Ikasketa-planetan familia-medikuntzaren presentzia areagotzea, etorkizuneko medikuentzat erakargarriagoa izan dadin.
- Familia-medikuei autonomia handiagoa ematea, prozedura eta proba diagnostikoak espezialistengana etengabe bideratu beharrik gabe egiteko aukera emanez.
- Lehen mailako arretaren eta arreta espezializatuaren arteko lankidetza indartzea, pazientearen jarraipena hobetzeko.
Familia-medikuntza indartzeak, profesionalei mesede egiteaz gain, herritarren osasuna hobetzen du eta osasun-sistema osoa optimizatzen du. Hori lortzeko, kolektibo osoak bat egin behar du eta ahots bakarrarekin hitz egin behar du, espezialitate horrek eta gizarteak behar dituzten hobekuntzak exijituz.
